Украины нисгэгчгүй онгоцнууд Уралын нуруунд хүрч, Екатеринбург хот дахь Wildberries компанийн агуулах руу довтолжээ

Украины тал Бямба гарагийн шөнө Оросын нутаг дэвсгэрт 300 гаруй нисгэгчгүй онгоцоор довтолжээ.

Дронууд хамгийн ойр нь хил залгаа Белгород муж, хамгийн хол нь Уралын бүс нутагт оршдог Екатеринбург хотод хүрсэн байна.

Үүний улмаас Белгород мужид хоёр хүний амь үрэгдэж, Екатеринбург дахь Wildberries онлайн худалдааны компанийн ложистикийн төв үйл ажиллагаагаа түр зогсооход хүрчээ.

Дөрвөн цагийн дараа уг төв ямар нэг хохирол амсаагүй, үйл ажиллагаагаа сэргээснийг Wildberries мэдээлсэн байна.

Свердловск мужийн захирагч Денис Паслер дронууд Wildberries компанийн агуулахын автомашины зогсоолд унахад гал гарснаас өөр хохирол учраагүйг мэдээлжээ.

Өчигдөр тус хотод зохион байгуулагдаж буй Оросын хөнгөн атлетикийн аварга шалгаруулах тэмцээний сүүлчийн өдөр байсан бөгөөд халдлагын үеэр тамирчид, хөгжөөн дэмжигчдийг цэнгэлдэх хүрээлэнгээс гаргаж, хоргодох байранд шилжүүлсэн байна.

Баасан гарагаас Бямба гарагт шилжих шөнө Оросын нутаг дэвсгэрт нэвтэрсэн нийт 328 дроныг устгаснаа тус улсын батлан хамгаалах яам мэдээлжээ.

Москва хотын захирагч Сергей Собянин зөвхөн нийслэл хот руу 200 орчим дрон чиглэж байсныг мэдэгдэлдээ дурдсан байна.

Украины хилээс 2,000 гаруй километр зайд оршдог баруун Сибирийн Тюмень мужийн газрын тос боловсруулах үйлдвэр өчигдөр бас дроны цохилтод өртжээ.

Уг үйлдвэр жилд 8 сая тонн газрын тос боловсруулах хүчин чадалтай юм. Тюмений захирагч Александр Моор онцгой байдлын албаныхан хариу арга хэмжээ авч байгаа гэхээс илүү мэдээлэл өгөөгүй байна.

Баасан гарагт Москва хотоос зүүн зүгт хэдэн зуун километр зайд оршдог Киров хотын нэг үйлдвэр Украины нисгэгчгүй онгоцны цохилтод өртөхөд таван хүн амь үрэгдэж, орон нутгийн удирдлага гурван өдрийн гашуудал зарласан юм.

Эх сурвалж: AFP ...