Пенсильвани мужийн захиргаа Леброн Жэймсийг "76" багт нэгдэхээ зарласан өдрийг албан ёсоор тэмдэглэлт өдөр болгов

Хойд Америкийн Үндэсний Сагсан Бөмбөгийн Холбоо (NBA) хөл хөдөлгөөн ихтэй байна. Учир нь чөлөөт тоглогч болоод байсан Леброн Жэймс шинэ багаа зарласан юм. Түүний энэ удаагийн сонголт "Филадельфи 76" баг байв. Ирэх арванхоёрдугаар сард 42 нас хүрэх Леброн хоёр жилийн хугацаанд $8 сая буюу ахмад тоглогчийн гэрээгээр багт нэгдсэн.  

Л.Жэймсийн гол зорилго аваргын цом. Зодог тайлахаасаа өмнө тав дахь бөгжөө зүүх хүсэл түүнд бий. Энэ зорилгодоо хүрэхэд "Филадельфи 76" баг хамгийн тохиромжтой нь гэж тэр шийдсэн бололтой. АНУ-ын бахархал, түүхийг тээж явдаг том хотын багуудын нэг нь яах аргагүй "76" юм. Гэхдээ энэ баг 1983 оноос хойш аваргын цомын бараа хараагүй байна. Үүнээс хойших хамгийн оргил амжилт нь 2001 онд Дорнод бүсийнхээ аварга болсноос хойш 25 жилийн хугацаанд хасагдах шатны хоёрдугаар тойргоос хэтрээгүй.

Тэгвэл Л.Жэймсийг багтаа нэгтгэснээр ирэх улиралд түрүүлэх хамгийн өндөр магадлалтай багийн тоонд зүй ёсоор орж байгааг бооцооны сайтууд баталж буй.

Түүнийг багтаа нэгдсэнийг сонссон Пенсильвани мужийн захирагч Жош Шапиро долдугаар сарын 24-ний өдрийг албан ёсоор Леброн Жэймсийн өдөр гэж зарлав. 

Жош Шапиро өөрийн шийдвэрийнхээ талаар "Леброн Филлид ирлээ. Мужийн захирагч бөгөөд тус багийн үнэнч хөгжөөн дэмжигчийн хувьд түүнийг багт нэгдэхийг зарласан өдрийг "Леброн Жэймсийн өдөр" болгон зарлаж байна. Ахан дүүсийн хайрын хотод тавтай морил, Хаан Жэймс" хэмээн өөрийн цахим хуудсандаа бичжээ. ...