Энэтхэгийн улс төрийн идэвхтэн өлсгөлөнгөө 26 хоногийн дараа зогсоолоо

Энэтхэгийн улс төрийн идэвхтэн Сонам Ванчук боловсролын салбарын шинэчлэлийг шаардсан залуучуудын жагсаал тэмцлийг дэмжиж зарласан өлсгөлөнгөө 26 хоногийн дараа зогсоожээ.

Тэрбээр “нөхцөл байдлыг тал бүрээс нь удаан хэлэлцэж, улс оронд хүчирхийлэл гарахаас урьдчилан сэргийлэх зорилгоор” өлсгөлөнгөө зогсоосныг сошиал хуудсандаа бичсэн байна.

59 настай Ванчук залуусын дунд өрнөсөн Жоомнуудын Жанта Нам хөдөлгөөн болон тус хөдөлгөөний гишүүдийн боловсролын сайд Дхармендра Прадханыг огцруулахыг шаардсан тэмцлийг дэмжиж өлсгөлөн зарласан юм.

Тэрбээр өмнө нь 11 кг жин хассан ч “амьд хэвээр байгаа”-гаа мэдэгдэж байв.

Түүнийг өнгөрсөн Бямба гарагт нийслэл Делид болж буй жагсаалын дундаас хүчээр гаргаж, эмнэлэгт хэвтүүлсэн юм.

Орон нутгийн хэвлэлүүдийн мэдээлснээр Энэтхэгийн засгийн газар жагсаалыг зохион байгуулагчдад хуулийн хариуцлага хүлээлгэхгүйгээ амласны дараа Ванчук өлсгөлөнгөө зогсоосон гэнэ.

Энэтхэгийн эрүүл мэндийн сайд, орон нутгийн удирдлагууд Ванчукийг эмнэлэгт эргэсэн байна.

Жоомнуудын Жанта Нам хөдөлгөөний үүсгэн байгуулагч Абхижит Дипке “Ноён Сонам 26 хоногийн дараа өлсгөлөнгөө зогсоосонд бид тайвширч, талархаж байна” гэж сошиал хуудсаараа мэдэгджээ.

Гэхдээ тэр жагсаал нь боловсролын сайдыг огцрох хүртэл үргэлжлэхийг амласан байна.

Гэрэл зургийг Reuters агентлагийн онцгой зөвшөөрөлтэйгөөр ашиглав

Даваа гарагт цагдаа нар жагсаалыг тараахыг оролдсон ч амжилт олоогүй юм. Үүний улмаас олон тооны жагсагчид болон цагдаагийн албан хаагчид бэртэж гэмтсэн байна.

Тавдугаар сард элсэлтийн шалгалтын материал задарсан болон бусад зөрчилтэй холбогдуулан залуус эсэргүүцлийн цуглаан зохион байгуулж байв. Боловсролын сайд Дхармендра Прадхан тэднийг “жоомнууд” гэж нэрлэсний дараа залуусын тэмцэл жоомыг бэлгэдлээ болгосон улс төрийн хөдөлгөөн болж өргөжсөн юм. Одоогоор уг хөдөлгөөн олон сая дэмжигчтэй болж, 2014 оноос хойш эрх барьж буй ерөнхий сайд Нарендра Модигийн засгийн газрын хувьд томоохон сорилт болоод байна.

Эх сурвалж: BBC ...