Путинтэй уулзах үеэрээ Казахстаны ерөнхийлөгч түүнд Украины дайныг зогсоох цаг болсныг сануулжээ

Бямба гарагт Сибирийн Омск хотод зохион байгуулагдсан Орос-Казахстаны форумын үеэр Казахстаны ерөнхийлөгч Касым-Жомарт Токаев өөртэй нь зэрэгцэж суусан ОХУ-ын ерөнхийлөгч Владимир Путинд дайнаа зогсоож, энхийн яриа хэлэлцээнд шилжих цаг болсныг сануулжээ.

“Надаас асуусанчлан би өөрийн хувийн саналаа хэлмээр байна. Энэ мөргөлдөөнийг зогсоож, Истанбул 2.0 формат руу буцах цаг болсон байх гэж би бодож байна” гэж Токаев хэлсэн юм.

Орос, Украин улсууд 2022 оны эхээр дайн эхэлсний дараахан, сүүлд 2025 онд Истанбулд яриа хэлэлцээрт оролцсон ч амжилт олоогүй. Токаев энэ уулзалтыг сэргээх цаг болсныг хэлсэн хэрэг байв.

“Орос мэтийн их гүрний аюулгүй байдлын баталгаатайгаар бид удаан хүлээсэн энх тайвнаа тогтоох чиглэлд урагшилж чадна. Үүнийг зогсоох цаг болсон” гэж Токаев цааш нь хэлжээ.

Хариуд нь Путин түүнд Украин дахь Оросын цэргийн тусгай ажиллагааны өнөөгийн нөхцөл байдлыг нарийвчлан тайлбарласныг Кремлийн хэвлэлийн төлөөлөгч Дмитрий Песков мэдээлсэн байна.

“Киевийн одоогийн байр суурийг харгалзан үзвэл мөргөлдөөнийг зогсоох боломжгүй байгаа”, “Хэрвээ Киев зохих шийдвэрээ гаргавал ажиллагааг өнөөдөр ч зогсоох боломжтой” гэх зэргээр Путин энэ үеэр ярьсныг Песков эш татжээ.

Өнгөрсөн сард Путин эзлэгдсэн дөрвөн мужаас Украины тал цэргээ бүрэн татах, НАТО-д элсэх төлөвлөгөөнөөсөө ил тод татгалзах Оросын шаардлага хэвээр байгааг мэдэгдэж байсан юм.

Эх сурвалж: Reuters ...