Barcelona përshpejton largimet e tre lojtarëve, Flick jep dritën jeshile

Barcelona ka hyrë në fazën vendimtare të afatit kalimtar të verës, duke punuar intensivisht për të finalizuar largimin e tre futbollistëve me synimin për të ulur faturën e pagave dhe për të krijuar hapësirë financiare për afrimet e reja.

Sipas raportimeve, drejtuesit katalanas po punojnë për zgjidhjen e situatave të Marc-Andre ter Stegen, Marc Casado dhe Roony Bardghji, tre lojtarë që nuk bëjnë pjesë në planet e trajnerit Hansi Flick për sezonin e ardhshëm.

Pas shitjes së Ansu Fatit te Monaco për 11 milionë euro, Barcelona dëshiron të vazhdojë me largime të tjera për të përmirësuar situatën ekonomike të klubit.

Ter Stegen drejt huazimit?

Prioriteti i Barcelonës mbetet zgjidhja e çështjes së Marc-Andre ter Stegen. Portieri gjerman nuk konsiderohet pjesë e projektit të ri të Hansi Flick, pasi në skuadër ndodhen Joan Garcia dhe Wojciech Szczesny.

Me kontratë deri në vitin 2028 dhe një nga pagat më të larta në ekip, një transferim përfundimtar shihet si i vështirë. Për këtë arsye, klubi po punon për një formulë huazimi.

Sipas raportimeve, Ajax është klubi më i interesuar për shërbimet e portierit gjerman. Megjithatë, pengesa kryesore mbetet marrëveshja për ndarjen e pagës së tij mes dy klubeve.

Barcelona shpreson që, pasi të zgjidhet kjo çështje, të ketë më shumë hapësirë financiare për të tentuar afrime të rëndësishme gjatë afatit kalimtar, mes emrave të përmendur janë Julian Alvarez dhe Aymeric Laporte.

Casado dhe Bardghji pranë largimit

Ndërkohë, drejtoria sportive e Barcelonës po shqyrton edhe shitjen e mesfushorit Marc Casado.

Futbollisti ka zgjuar interesim nga klubet e Arabisë Saudite dhe katalanasit janë të gatshëm të dëgjojnë oferta që përmbushin kërkesat financiare të klubit.

Edhe sulmuesi i krahut, Roony Bardghji, pritet të largohet gjatë kësaj vere.

Barcelona po vlerëson dy opsione: huazimin me të drejtë blerjeje ose shitjen përfundimtare, në mënyrë që të sigurojë të ardhura të menjëhershme.

Drejtuesit e Barcelonës pritet të zhvillojnë takime të rëndësishme me përfaqësuesit e Ajaxit në javët e ardhshme për të finalizuar marrëveshjen për Ter Stegen.

Pasi të mbyllet largimi i portierit gjerman, klubi synon të zyrtarizojë edhe largimet e Casados dhe Bardghjit përpara nisjes së turneut parasezonal. /Telegrafi/ ...